قولوا لرعـيان الـغــنم لايـنـامون
اشـوف بالمرعى مواطي ذيـــابه
قولوا لهم خذوا الحذر لاتغـفـلون
كـم غـافـلٍ اصبـح حـلالـه نهـابـه
قولوا الـذيابه بالغـداري يغـيرون
والجوع ينسيها الخطر والمهابه
والذيب مايومن على مايـقـولـون
يغـرس بارقاب الفرايس انيـابــه
تلقون ضرب انيابها كنها طعـون
وجر المخالب مثل جـر الحـرابـه
اقـسم برب البيت ماني بمجـنـون
ولاني ردي الاصل ولاني زلابــه
اشـوف أشـياءٍ لـهـا ما تـشوفون
تغيب عن بعض العـقـول النجابـه
اقول قـولي والخـلايـق يعـرفـون
خير الملا من قـبـلـنا قـد حكى به
لابــد مـايــومٍ إلى الله تـعـــودون
وكلٍ يبي يسأل عن اللي رعى بـه
اللي رعـوا بالشر للشر يجـنـون
واللي رعى بالخير يجـني ثـوابه
