:ok_hand_tone1:قصيدة تطوير الذات بدون دورات :
يقول الشاعر محمد الجذع العتيبي
يامطورين الذات بحثاً عن الذات..
انا بعد طورت ذاتي بذاتي
لأنني غيرت روتين الأوقات
ولها السبب قدرت أغير حياتي
ماعاد أفكر بالسنين القديمات
ولاأشيل هم سنيني المقبلاتي
اللي مضى ماهوب راجع بعد مافات..
والجاي يمكن قبله الموت ياتي..!!
يعني أعيش اليوم واليوم ساعات
واللي يبي الراحه يسوي سواتي
العمر رحلة والليالي محطات
والموت رمحه مثل رمح الزناتي
أثري من أول عايش في متاهات
ومقزر عمري على ذكرياتي
لكن بلا تعقيد.. وأحزان آهات
قررت ألملم مابقى من شتاتي
وعملت في نفسي شويةإصلاحات
وإصلاحي لنفسي على نحو آتي :
بنيت في صدري مساجد وروضات..
وقمت أتهجد يوم غيري يباتي
وحفظت من فضل الولي عدة آيات
وجلت غبار الحزن والأغنياتي
وسويت فلتر للهواجيس بالذات
والحزن داخل سلة المهملاتي
ورتبت بالترتيب بعض الملفات
وحطيت بالرف القريب أمنياتي
وركزت في وقتي على الأولويات
والأول الأهم ...عندي صلاتي
وإثنين بالإثنين بر ومرضات
امي وأبوي سلوتي مع غناتي
والثالث الإحسان مع المساواة
لعيالي الغالين وخواني وخواتي
والرابع أمشي ماحسبت المسافات
لأن السفر ألقابه أجمل صفاتي
وخمسه حرمت الذات بعض الملذات
والإتزان أصبح سمة من سماتي
والحمدلله عايش في سهالات
متريح بالي... ولاعاد أحاتي
يعني كذا ماني بحاجه لدورات
في عقلي الباطن أو إيحاء ذاتي
أنا فقط محتاج رب السموات
يغفر لي ذنوبي.. بساعة وفاتي.