- ليه حجيت ١٤ مرة وخليت مراتك تتحجب مع انها كانت ممثله شاطرة وفي بدايتها، ليه حجبتها وانهيت علاقتها بالفن؟
دا السؤال اللي سأله عمرو الليثي للفنان سعيد صالح الله يرحمه، علشان يرد عليه ويقوله :
لاني كنت محتاج لده ...وهي كمان كانت محتاجة دا،كنت بحبها وخايف عليها،خايف من الفن والوسط الفني، وكنت خايف من ربنا !!
فسأله عمرو الليثي وقوله : طب والعمرة يا عم سعيد ؟!
رد عليه الفنان سعيد صالح :
كنت بني ادم زي اي شاب، بعمل كل حاجه وطايش وبتاع وحاجات من دي، وفجأة دخلت السجن قعدت سنه ..السنه اللي قعدتها في السجن كانت سبب تغيير حياتي خالص، قابلني واحد اسمه عم يوسف لسه بعرفه لغاية دلوقتي
هو عرف اني موجود ف السجن، فبعتلي فمروحتش، وبعدين قررت اروحله ..لقيت زنزانته مليانه خير وأكل ومليانه ناس وعساكر!!
كان تمامنا الساعه ٥ في السجن، وبعدها بيقفلوا كل الزنازين، الا هو كانوا بيقفلوا زنزانته، بعد معادنا بساعتين، خدني وطلعنا جرينا في السطح ولقيته بيقولي مش عايز ربنا يكلمك ؟
قولتله ربنا ؟! .. يكلمني انا ؟! طب ازاي ؟
قالي اقرا قران هتلاقي ربنا بيكلمك ..سمعت الكلام ده وروحت جايب مصحف وبقيت اقرا واحفظ واسمعله تاني يوم، لغاية ما بقيت بصلي واصوم ولقيت السنه مرت جميلة جدا، وعرفت حاجات كتير كانت غايبه عني ...خرجت من السجن قولت يارب عمرة بقه ..طلعت حجه ..حجيت ١٤ حجه ورا بعض ...سنه واحده بس اللي محجتش فيها، اللي هي السنادي بتاعة انفلونزا الخنازير لكن ان شاء الله هكمل، والسنة الجاية هعمل حجة
لما روحت لقيت صدري انشرح كدا، وحبيت الحكاية وتدينت جامد وانا اصلا والدي كان ازهري وكان عايز يطلعني حافظ قران بس انا طنشت وكان طيش الشباب بقى !
- خايف من مقابلة ربنا يا عم سعيد ؟
- ماهو لازم اخاف وكلنا نخاف بس احنا لو وضبنا نفسنا مش هنخاف ..اينعم ليا تاريخ مزفت بس اللي عملته هيغفرلي ان شاء الله، وانا واثق ان ربنا هيغفرلي
الراحل سعيد صالح في لقاء تلفزيوني مع عمرو الليثي
ادعوله دعوة حلوة بالمغفرة ولوالدي وكل امواتنا
#حكايات_الزمن_الجميل
