سمعت من بوح المحبين طاروق
الذّ من طلع العذوق المدانيق
ياحي منطوقن ماهو بأي منطوق
يروي الكبود الضاميات المشافيق
همس الحبايب بين عاشق ومعشوق
خلاّني اصحى من عنا الوقت وآفيق
سدّي من اول بالمهاديف موثوق
عليه قفّلت الضلوع المغاليق
جاه الذي قام يتحاداه برفوق
نكّد عليّه شوق بيض الغرانيق
محمد عسى يمنى معاديه للعوق
السور ماروث الرجال المطاليق
سمي عودن للمعالي شهر فوق
حرٍ قطامي مالزمته مسابيق
ياكم سجينن دونه الباب مغلوق
فكّه ورده من قبل فكّة الريق
وياكم ضهيدن سهّر الدين له موق
خلاّه يمشي في حسين التوافيق
يالله عساه بجنّة الخلد موفوق
واللي بقى يكفيه شر المخاليق
حيث انهم شجرة تذرّي عن البوق
في وجه صلفات السنين الزواريق
هذا وياشاكي من الحب والشوق
مابه قلوب من المحبه معاتيق
اخذ طرات الحب والعمر ملحوق
مايوجد احلى من غرام العشاشيق
لاصرت له شوقن وهو صار لك شوق
وحبّه تمكّن في عروش المعاليق